മടക്കയാത്ര; ഓർമയിലെ ഓ ഖാലിദ് എന്ന പുസ്തകത്തിൽനിന്ന്

സലാലയിൽ നിന്ന് നാട്ടിലേക്ക് പറന്ന ഖാലിദ് വഴിയേ ശാശ്വത ലോകത്തേക്ക് യാത്രയായി നടുക്കുന്ന ഓർമ്മകളിലേക്ക് ഒരു തിരിഞ്ഞുനോട്ടം.

1995 ഏപ്രിൽ 20 വ്യാഴാഴ്ച

ഇന്നു വൈകിട്ടാണ് ഖാലിദിന്റെ നാട്ടിലേക്കുള്ള യാത്ര. സലാല ഇന്ത്യൻ സ്കൂളിലെ സഹപ്രവർത്തകരോട് ഇനിയും യാത്ര പറഞ്ഞിട്ടില്ല.

സുബഹി നിസ്കാരം കഴിഞ്ഞ് പതിവുപോലെ അന്ന് സ്കൂളിലേക്ക് പോയത് അതിനു വേണ്ടിയായിരുന്നു. അല്പം വർക്കുകളും ബാക്കിയുണ്ട്. എല്ലാം ഭംഗിയായി ചെയ്തു തീർത്ത് യാത്ര പറഞ്ഞിറങ്ങി. സഹപ്രവർത്തകരോട്, സ്ഥാപനത്തിലെ മേലധികാരികളോട്, എല്ലാറ്റിലുമുപരി തന്റെ പ്രിയപ്പെട്ട ശിഷ്യഗണങ്ങളോട്.

വീണ്ടും റൂമിൽ തിരിച്ചെത്തുമ്പോൾ സമയം ഉച്ചയ്ക്ക് ഒരു മണി കഴിഞ്ഞിരുന്നു. പാലക്കാട് ഹംസ സാഹിബ് ക്ഷണിച്ച കാര്യം അപ്പോഴാണ് ഓർമ വന്നത്. നിസ്കാരം നിർവഹിച്‌ ഖാലിദ് അങ്ങോട്ട് പോകാൻ ഒരുങ്ങി.കൂടെ പി എസ് കെ മൊയ്തു ബാഖവിയും ഉണ്ടായിരുന്നു. വിഭവസമൃദ്ധമായ സദ്യയുണ്ട് വീണ്ടും "റുമൂഷിൽ" തിരിച്ചെത്തുമ്പോൾ സമയം മൂന്നര. സഅദിയ്യ:കോളേജിന്റെയും മറ്റു ചില സ്ഥാപനങ്ങളുടെയും കണക്കുകൾ പ്രവർത്തകർക്ക് കൈമാറി.റൂം വാടക വകയിലും മറ്റും നൽകാനുള്ള സംഖ്യകൾ ബന്ധപ്പെട്ടവരെ ഏൽപ്പിച്ചു. എല്ലാം ക്ലിയർ. പള്ളിയിൽ നിന്ന് അസർ നിസ്കാരത്തിന് വിളിയാളമുയർന്നു. റൂമിൽ വച്ച് തന്നെ നിസ്കാരം നിർവഹിച് "റുമൂഷ്‌" ഹൗസിന്റെ പടിയിറങ്ങുമ്പോൾ സഹപ്രവർത്തകർ ഖാലിദിനെ അനുഗമിച്ചു.

അവർ നേരെ പോയത് സലാല എയർപോർട്ടിലേക്ക്. കൂടെ പോയ കൂട്ടുകാരോട് സംഘടനാ കാര്യങ്ങൾ പലതും സംസാരിച്ച കൂട്ടത്തിൽ ഐ പി മുഹമ്മദലിയെ വിളിച് ഖാലിദ് പ്രത്യേകമായി പറഞ്ഞു" ഇതാ ഇനി ഞാൻ വരാൻ കാത്തിരിക്കരുത് എല്ലാം ഉഷാറായി നടത്തണം. മൊയ്‌ദു ബാഖവിയുടെ പ്രസംഗം ടേപ്പ് ചെയ്ത് എസ് ആർ എഫ് ലൈബ്രറിയിൽസൂക്ഷിക്കണം" ഒമാൻ എയർവിമാനം പറന്നുയരാൻ ഒരുങ്ങി നിൽക്കുകയായിരുന്നു ഒരിക്കൽ കൂടി യാത്ര ചോദിച് ഖാലിദ് പറന്നു- മസ്കറ്റിലേക്ക്.

സ്നേഹം തന്ന് സ്നേഹം സമ്പാദിച്ച ഉറ്റമിത്രം സലാലയിൽ നിന്ന് യാത്ര പുറപ്പെട്ടു എന്നറിഞ്ഞ് മസ്കറ്റിൽനിന്ന് ഏതാനും പ്രവർത്തകർ എയർപോർട്ടിലേക്ക് പുറപ്പെട്ടു. ഇസ്ഹാഖ് മട്ടന്നൂരും ആ കൂട്ടത്തിൽ ഉണ്ട്. അവസാനമായി ഒന്ന് ആശ്ലേഷിച്ച് യാത്രാമംഗളം നേർന്ന് അവർ തിരിച്ചു വരുമ്പോൾ ഗൾഫ് എയറിന്റെ വിമാനത്തിൽ ബോംബ്ക്ക് പറന്നുകഴിഞ്ഞിരുന്നു.

ഏപ്രിൽ 21 വെള്ളിയാഴ്ച.

പുലർച്ചെ എയർപോർട്ടിൽ ഇറങ്ങിയ ഖാലിദ് രാവിലെ 11 30ന് കോഴിക്കോട്ടേക്ക് യാത്രയായി. ഉച്ചക്ക് രണ്ടുമണി.

ജംബോ ജെറ്റ് എയർവെയ്സ് കോഴിക്കേട് വിമാനം കരിപ്പൂരിലെ മേഘപാളികൾക്ക് മീതെ തെളിഞ്ഞു വന്നു. യാത്രയയക്കാനും സ്വീകരിക്കാനും വരുന്നവരുടെ ശബ്ദകോലാഹലങ്ങൾക്കിടയിലേക്ക് ആ കൂറ്റൻ പക്ഷി റൺവെയിൽ വന്നു നിന്നു. നിറഞ്ഞ ആഹ്ളാദത്തോടെ യാത്രക്കാർ ഓരോരുത്തരായി ഇറങ്ങി വരുന്നതും നോക്കി പുറത്തുനിൽക്കുന്ന ബന്ധുക്കൾ, സ്ത്രീകളും കുട്ടികളും മുതിർന്നവരും സലാലയിൽ നിന്ന് നാട്ടിലെത്തുന്ന ഖാലിദിനെ സ്വീകരിക്കാൻ ചൊക്ളിയിൽ നിന്നും സഫീറും സമീറും കാത്തിരിപ്പുണ്ടായിരുന്നു. സഹയാത്രികനായ കണ്ണൂരിലെ തൽഹയോടൊപ്പം ദൂരെനിന്ന് പുഞ്ചിരിയുമായി കടന്നുവന്ന ഖാലിദ് ഓരോരുത്തരേയും സലാം പറഞ്ഞു ആലിംഗനം ചെയ്തു. ക്ഷേമാന്വേഷണങ്ങൾക്ക് ശേഷം ജീപ്പിൽ കയറി യാത്രയായി. അല്ലാഹുവിന്റെ പരിശുദ്ധിയെ വാഴ്ത്തിക്കൊണ്ട് ഞങ്ങൾക്ക് ഈ വാഹനത്തെ കീഴ്പ്പെടുത്തിയവൻ എത്ര പരിശുദ്ധൻ അതിനെ ഇണക്കുവാൻ ഞങ്ങൾക്ക് കഴിവില്ലായിരുന്നു.നിശ്ചയം ഞങ്ങൾ നാഥനിലേക്ക് തിരിച്ചു വരുന്നവരാണ്.

സമയം മൂന്നുമണി

കോഴിക്കോട് ഐ. ജി റോഡിലെ സ്റ്റുഡന്റസ് സെന്റർ. സ്വപ്നങ്ങളിൽ പൂത്തുലഞ്ഞുനിന്ന സംഘടനയുടെ സംസ്ഥാന കാര്യാലയം. നാട്ടിലെ നെട്ടോട്ടങ്ങൾക്കിടയിലും, ഗൾഫിലെ പൊള്ളുന്ന മണലിൽ വിയർപ്പൊഴുക്കുമ്പോഴും താൻ താലോലിച്ചു വളർത്തിയ രിസാല. ഗൾഫിൽ നിന്നു കുറെ ന്യൂസുകളും പ്രവർത്തകരുടെ കാത്തുക്കളുമായി സമീർ അങ്ങോട്ട് ചെന്നു. പുറത്തു ജീപ്പിൽ ഖാലിദുണ്ടെന്നറിഞ്ഞപ്പോൾ ഓഫിസ് സെക്രട്ടറി സലീം അണ്ടോണ അവിടേക്ക് ചെന്ന് ഓഫീസിലേക്ക് ക്ഷണിച്ചു

"ക്ഷണിക്കാത്തത് കൊണ്ടല്ല ഞാൻ വരാത്തത്. നല്ല ക്ഷീണമുണ്ട്. നിനക്കറിയില്ലേ, കഴിഞ്ഞ തവണ ഞാൻ വന്നപ്പോൾ വീട്ടിലറിയിച്ചിരുന്നില്ല. നേരെ ഇവിടെ ഓഫീസിലേക്കായിരുന്നു വന്നത്. അന്നെനിക്ക് ബാധ്യതകളില്ലായിരുന്നു. ഈ വണ്ടി നോക്കു സലീം, എന്റെ ഭാര്യ വീട്ടുകാർ അയച്ചതാണ്. ഇന്നെന്നെ കാത്തിരിക്കാനാളുണ്ട്, ഞാൻ ഉടനെ വരാം, പോരെ. "

സംസ്ഥാന സമിതിയുടെ പോളിസി പ്ലാനിംഗ് സെൽ ചേരുന്നതിനാൽ മുതിർന്ന നേതാക്കളെല്ലാം സെന്ററിൽ ഉണ്ടായിരുന്നു. സി പി സൈതലവി, ജി അബൂബക്കർ,പി കെ എം ഇരിങ്ങല്ലൂർ, മജീദ് കക്കാട്.

നേതാക്കൾ ഖാലിദിനെ കാണാൻ വാഹനത്തിന്റെ അരികിലേക്ക് വന്നു. പതിവു ശൈലിയിൽ കുറെ

തമാശകൾ,പൊട്ടിച്ചിരികൾ ക്ഷേമ അനേഷണങ്ങൾ, സംഘടന കാര്യങ്ങൾ പറയാനും മറന്നില്ല. ഖാലിദിന് സംഘടനയായിരുന്നല്ലോ വലുത് സംഘടനയ്ക്ക് ഖാലിദും.

രിസാലയെ കുറിച്ച് ഒരുപാട് കാര്യങ്ങൾ മനസ്സിൽ ഉണ്ട് ഞാൻ രണ്ടു ദിവസം കഴിഞ്ഞു വരാം ഇപ്പോ എനിക്ക് തിരക്കുണ്ട്.

ഖാലിദ് എന്നും തിരക്കിലായിരുന്നല്ലോ. അനുവദിക്കപ്പെട്ട സമയം കർമ്മഫലങ്ങൾക്കായി തിരക്ക് പിടിച്ചു നടന്ന ചെറുപ്പക്കാരൻ. വഴിയിലെവിടെയോ കാത്തുനിന്ന മരണത്തിലേക്ക്,വിധി പുസ്തകത്തിൽ കുറിച്ചിട്ട അവധിയുടെ അവസാന നിമിഷങ്ങളിലേക്ക് കുതി ചെത്താൻ ഖാലിദിന് തിരക്കുണ്ടായിരുന്നു. കരിപ്പൂരിൽ ഖാലിദിനെ സ്വീകരിക്കാനെത്തിയ ഭാര്യാ സഹോദരനും അതിലുപരി ഉത്തമ സുഹൃത്തുമായ സഫീർ ഇനി രാത്രിയിൽ കാണാമെന്ന് പറഞ്ഞ വഴിപിരിഞ്ഞു. ജീപ്പിൻറെ പിൻ സീറ്റിൽ കയറിയിരുന്നു ഖാലിദ് യാത്ര പറഞ്ഞു. ആ യാത്ര ഇനി തിരിച്ചു വരാത്ത ഒരാളുടേതായിരുന്നെന്ന് എങ്ങനെ അറിയാൻ!! അറിഞ്ഞിരുന്നെങ്കിൽ തടഞ്ഞു വെച്ചേനെ. പക്ഷേ നാഥന്റെ വിധിയെ മറികടക്കാൻ സൃഷ്ടി ജാലങ്ങൾക്ക് കഴിയില്ലല്ലോ.

നാലു മണി കഴിഞ്ഞ ആ സായാഹ്നം.

കൊയിലാണ്ടിക്കടുത്ത മൂടാടിയിൽ ഖാലിദ് സഞ്ചരിക്കുന്ന ജീപ്പിനു മുന്നിലേക്കു വന്ന ഒരാളെ രക്ഷിക്കാനുള്ള ശ്രമം . പിൻ സീറ്റിൽ സുഖമായി ഉറങ്ങുന്ന ഖാലിദ് ഒന്നും അറിഞ്ഞിരുന്നില്ല. നിയന്ത്രണം വിട്ട ജീപ്പ് ഒരു മതിലിന് മുകളിലുടെ കയറിമറിഞ്ഞു വീണത് നിമിഷനേരം കൊണ്ടായിരുന്നു . രക്തത്തിൽ കുളിച്ച് ഖാലിദ് ! ആയിരങ്ങളുടെ പടനായകനാണ് പിടയുന്നതെന്ന് കൂടിയിരുന്നവരാരുമറിഞ്ഞില്ല. നല്ലവരായ നാട്ടുകാരിൽ നിന്നും മനുഷ്യ സ്നേഹത്തിന്റെ തുടിപ്പുയർന്നു. മെഡിക്കൽ കോളേജിൽ എത്തിക്കാനും ജീപ്പിൽ നിന്ന് കിട്ടിയ നമ്പറിൽ ചൊക്ലിയിലെ വീട്ടിൽ അറിയിക്കാനും അവരുണ്ടായി.

പ്രത്യക്ഷത്തിൽ ഖാലിദിന്റെ ശരീരത്തിൽ പോറലുകളൊന്നുമില്ല . വായിലൂടെ രക്തമൊലിക്കുന്നു . ശ്വാസം കിട്ടാതെ ബുദ്ധിമുട്ടുന്നുണ്ടായിരുന്നു. ഉറങ്ങുന്ന ഖാലിദ് പിന്നെ അബോധാവാസ്ഥയിലേക്ക്, ആ കണ്ണുകൾ അടഞ്ഞുതന്നെ കിടന്നു.

സീറ്റിന്റെ മുൻ നിരയിലുണ്ടായിരുന്ന ഖാലിദിന്റെ സഹയാത്രികൻ ത്വൽഹയ്ക്കും സാരമായ പരിക്കുകളുണ്ട്. ഡ്രൈവർ ഹമീദിനും ഭാര്യാ സഹോദരൻ സമീറിന്റെയും പരിക്കുകൾ നിസ്സാരം .

കവിയൂരിലെ സാബിറ പരിസരവും ഉത്സാഹത്തി മിർപ്പിലായിരുന്നു. ഖാലിദിനെ ഒരു നോക്ക് കാണാൻ കൊതിച്ച് കാത്തിരിക്കുന്ന ഉപ്പ, മകന്റെ വരവിനായി കാക്കുന്ന ഉമ്മ, മധുരതരമായ ഓർമ്മകൾ തന്നു ഓടിപ്പോയ പ്രിയതമന്റെ വരവും കാത്ത് ദിനങ്ങൾ എണ്ണി, വിരുന്നൊരുക്കി കാത്തിരിക്കുന്ന ഒരു പെൺകുട്ടി; നസീറ......

ധീരനായ ഒരു പടനായകൻ്റെ ജീവിതപങ്കാളി..... പിന്നെ സ്നേഹം കടംകൊടുത്ത സഹപ്രവർത്തകരും, നാട്ടുകാരും, അയൽക്കാരും, സുഹൃത്തുക്കളും.

അപകടത്തിൽപ്പെട്ട ജീപ്പിന്റെ സ്റ്റെപ്പിനി ടയറിലെ കവറിന്മേൽ തലശ്ശേരിയിലെ 'ഗ്രഹസ്യ' എന്ന സ്ഥാപനത്തിൻറെ പരസ്യം ഉണ്ടായിരുന്നു. അതിൻറെ ഭാര്യാപിതാവ് ഉസ്മാൻന്റെ സഹോദരനാണ് സ്ഥാപനത്തിന് ഉടമ. വൈകുന്നേരം ആറുമണിയോടെ അവിടുത്തെ 222902 എന്ന ഫോൺ ശബ്ദിച്ചു "മുടിയിൽ നിന്നാണ് ......നമ്പർ ജീപ്പ് ഇവിടെ അപകടത്തിൽ പെട്ടിരിക്കുന്നു.

ഗൾഫിൽ നിന്ന് വരുന്ന ആരോ അതിലുണ്ട്.

പിന്നെ ചൊക്ലി യിലും മോന്താലിലും ഈ വാർത്ത പടരാൻ ഏറെനേരം വേണ്ടിവന്നില്ല. നിമിഷങ്ങൾകൊണ്ട് ആ പ്രദേശങ്ങളിൽ ആകെ കരിവാളിപ്പ്.

ഖാലിദിൻറെ ജേഷ്ഠ സഹോദരൻ പോക്കുവും സലീമും മഅറൂഫും അവർക്കൊപ്പം ഖാലിദിനെ പ്രിയപ്പെട്ട മാതാവും മെഡിക്കൽ കോളേജിലേക്ക്.

മർക്കസിൽ നിന്നും സ്റ്റുഡൻസ് സെന്ററിൽ നിന്നും വാർത്തകൾ ഒഴുകി.

പ്രവർത്തകരുടെയും സ്ഥാപനങ്ങളുടെയും ഫോൺ വിശ്രമമില്ലാതെ ശബ്ദിച്ചു. മെഡിക്കൽ കോളേജ് കാഷ്വാലിറ്റിയി ലേക്ക് വരുന്ന കോളുകൾ മിക്കതും ഗൾഫിൽ നിന്നായിരുന്നു.

ശൈഖുനാ കാന്തപുരം ഉസ്താദ് ഓടിയെത്തി. ഡോക്ടർമാരുമായി സംസാരിച്ചു വേണ്ട നിർദേശങ്ങൾ നൽകി. ഖാലിദിന്റെ നില വഷളായതിനെ തുടർന്ന് കാര്യമായ പരിചരണം നല്കാൻ പറ്റിയില്ല. സ്കാനിംഗ് എടുക്കാൻ പറ്റാത്ത അവസ്ഥ. അനങ്ങിയാൽ രക്തമൊഴുകുന്നു. ഡോക്ടർമാർ ഇടയ്ക്കിടെ വായിൽ നിന്ന് രക്തമെടുത്തൊഴിവാക്കുന്നു. ചെറിയ ഇളക്കം പോലും പ്രശ്നങ്ങൾ ഉണ്ടാക്കി. ബോധം തെളിഞ്ഞില്ല. കണ്ണ് നീര് തുടച്ചു കൊണ്ട് സഹപ്രവർത്തകർ നാഥനോട് മനമുരുകി കേണു "നാഥാ ഞങ്ങളുടെ ഖാലിദിനെ നീ രക്ഷിക്കണേ... "

ശൈഖുനയുടെ ചുണ്ടുകൾ പ്രാർത്ഥനാമന്ത്രങ്ങളാരുവിടുന്നു. ഓരോ മുഖത്തും നിറഞ്ഞു നിൽക്കുന്ന ആകാംക്ഷ. ഫോൺ കോളുകൾക്ക് മറുപടി കൊടുക്കുമ്പോൾ ശബ്ദം പതറാതിരിക്കാൻ പാടുപെടേണ്ട സ്ഥിതി.

വിവരമറിഞ്ഞ പ്രവർത്തകർ ഉറങ്ങാതിരുന്ന രാവ്, ഞങളുടെ പ്രിയപ്പെട്ടവന് വേണ്ടിയുള്ള പ്രാർത്ഥനകൾ. മാട്ടൂൽ മൻഷഅ് യതീംഖാന അങ്കണത്തിലെ വഅളിന്റെ വേദിയിൽ നൂറു കണക്കിന് ആളുകളെ സാക്ഷിനിർത്തി ചിത്താരി ഹംസ മുസ്‌ലിയാർ പ്രാർത്ഥിച്ചു. ആമീൻ പറഞ്ഞ ചുണ്ടുകൾ വിതുമ്പുന്നുണ്ടായിരുന്നു.

ഖാലിദിന് ഒന്നും വരുത്തരുതേയെന്ന് മനമുരുകിക്കേണ മാതാവ്, രാത്രി പത്തര മണിയോടെ കഷ്വാലിറ്റിയിലെത്തിയ അവരെക്കണ്ട് ഒരു നിമിഷം എല്ലാവരും നടുങ്ങി. ഈ അവസ്ഥയിൽ അവർ ഖാലിദിനെ കണ്ടാലുണ്ടാവുന്ന പ്രശ്നങ്ങൾ. ഏതൊരു മാതാവിനാണ് താങ്ങാനാവുക? കൈകളിലിരുത്തി തരാട്ടുപാടി വളർത്തിയ ഓമനമകൻ ആശുപത്രികിടക്കയിൽ മരണത്തോടു മല്ലടിക്കുന്നത് കണ്ടാൽ സഹിക്കാൻ കെല്പുള്ള ഉമ്മമാരുണ്ടോ!

പ്രത്യേകിച്ചും ഹാജിയായി വരുന്ന മകനെ ചുംബിക്കണമെന്നു കത്തെഴുതി കാത്തിരുന്ന ഖാലിദിന്റെ ഉമ്മക്ക്‌ അതിനു കഴിയുമോ? ചില കാരണങ്ങൾ പറഞ്ഞ് അവരെ തിരിച്ചയക്കേണ്ടിവന്നു. ആ മാതൃഹൃദയം തേങ്ങി. സമയം രാത്രി പന്ത്രണ്ടേ അമ്പന്തഞ്ച്. ഖാലിദിന് നല്കപ്പെട്ട ആയുസ്സിന്റെ അവസാന നിമിഷം. രക്ഷിതാവിലേക്ക് മടക്കത്തിനു മണി മുഴങ്ങി.

ദാറുൽ ഖുലൂദിലേക്കുള്ള ഖാലിദിന്റെ യാത്രയുടെ മണിമുഴക്കം.

പുതുദിനത്തിന്റെ പിറവിയറിയാതെ ഇരുണ്ട രാത്രി. എല്ലാവരും ഉറക്കിലാണ്ട സമയം. അവരെല്ലാം നോക്കിനിൽക്കേ അബോധവസ്ഥയിൽ, ആ ധീരനേതാവ് അന്ത്യശ്വാസം വലിച്ചു.

ഇന്നാലില്ലാഹി വഇന്നാ ഇലൈഹി റാജിഊൻ....

ഡോക്ടർമാരെത്തി മരണം ഉറപ്പുവരുത്തി. ശൈഖുനാ കാന്തപുരം മർകസിൽ നിന്ന് തിരിച്ചുവന്ന് വേണ്ടതൊക്കെ ചെയ്തു. രണ്ടുമണിയോടെ മയ്യിത്ത് മോർച്ചറിയിലേക്ക് നീക്കി.

കഷ്വാലിറ്റിയിൽ ശബ്‌ദിച്ചുകൊണ്ടിരുന്ന ഫോണിലൂടെ പുതിയ വാർത്തയൊഴികി. ബാഹ്‌റൈൻ, ഒമാൻ, ഖത്തർ, യുഎഇ.. ഗൾഫുനാടുകളിലെ പ്രവർത്തകരെയെല്ലാം ശൈഖുനാ വിളിച്ചറിയിച്ചു. പത്രങ്ങൾക്കും എ. ഐ. ആറിനും റിപ്പോർട്ട്‌ കൊടുത്തു. ഗൾഫ് സുഹൃത്തുക്കൾ കേട്ടത് ശരിയോ എന്നുറപ്പിക്കാൻ ബന്ധുപ്പെട്ടുകൊണ്ടിരുന്നു. പലർക്കും വാക്കുകൾ മുഴുമിപ്പിക്കാൻ കഴിയുന്നില്ല. നേരം വെളുത്തുകഴിഞ്ഞിട്ടും ഫോണുകളുടെ മുഴക്കം നിലക്കുന്നില്ല.

ഏപ്രിൽ 22

രാവിലെ ആറേ അമ്പതിന്റെ പ്രാദേശിക വാർത്തയിൽ ഓർക്കാപ്പുറത്തുകേട്ട വാചകങ്ങൾ... " കൊയിലാണ്ടിക്കടുത്ത് മുടാടിയിൽ ഇന്നലെയുണ്ടായ വാഹാനാപകടത്തിൽ പരിക്കേറ്റ കേരള സ്റ്റേറ്റ് സുന്നി സ്റ്റുഡന്റ്സ് ഫെഡറേഷൻ മുൻ സംസ്ഥാന സെക്രട്ടറി, ശ്രീ. ഒ. ഖാലിദ് ഇന്ന് വെളുപ്പിന് കോഴിക്കോട് മെഡിക്കൽ കോളേജിൽ നിര്യാതനായി..."

വാർത്തകേട്ട് ഞെട്ടിയ പ്രവർത്തകർ മെഡിക്കൽ കോളേജിലേക്കും കവിയൂരിലേക്കും ഒഴുകിക്കൊണ്ടേയിരുന്നു. വിശ്വസിക്കാൻ കൂട്ടാക്കാത്ത മനസ്സുകൾ ! എന്നാലും ഞങ്ങളോടൊരു വാക്കു മിണ്ടാൻ, ഒന്നു പുഞ്ചിരിക്കാൻ , ആലിംഗനം ചെയ്ത് മുഖത്തുമ്മ വെക്കാൻ , ഞങ്ങളുടെ പ്രിയപ്പെട്ട ഖാലിദ് ഇനിയുണ്ടാവില്ലെന്ന തിരിച്ചറിവ് .

ഒന്നും പറയാതെ , കാത്തിരുന്നവരെ കാണാൻ വരാതെ, മാതാവിന്റെ മുഖത്തൊരു മുത്തം കൊടുക്കാതെ, തന്നെയും കാത്ത് ഓർമ്മകളയവിറക്കി കൊതിച്ചുനിന്ന പ്രിയതമക്ക് കൈവശം കരുതിയ സമ്മാനം കൊടുക്കാതെ ... ഖാലിദിക്കയെ കാത്തിരുന്ന കുട്ടികൾക്ക് നുണയാൻ മിഠായി കൊടുക്കാതെ,ഞങ്ങൾ കൂട്ടുകാരോട് , സഹപ്രവർത്തകരോട്, സലാം പറയാതെ , ഖാലിദിനെ സ്നേഹിച്ച ഖാലിദ് സ്നേഹിച്ച ആയിരങ്ങളെ കാത്തുനിൽക്കാതെ, ഞങ്ങളെ തനിച്ചാക്കി ഒറ്റക്ക് യാത്രയായ ഖാലിദ് ! ആരേയും കാത്തു നിൽക്കാത്ത മഹാമനീഷി !

മെഡിക്കൽ കോളേജ് മോർച്ചറി പരിസരം. പരിസരങ്ങൾ സുന്നി പ്രവർത്തകരും നേതാക്കളും കൂട്ടംകൂടി നിൽക്കുന്നു.

എല്ലാ മുഖങ്ങളിലും ദുഃഖത്തിന് കരിവാളിപ്പ്. പേരോട് അബ്ദുറഹ്മാൻ സഖാഫി കരഞ്ഞു കലങ്ങിയ കണ്ണുകളുമായി വന്നു.പ്രിയപ്പെട്ട ശിഷ്യന്റെ വേർപാട് അദ്ദേഹമെങ്ങനെ താങ്ങും! ആവശ്യമായ നിർദ്ദേശങ്ങൾ കൊടുക്കുമ്പോഴും അദ്ദേഹം വിതുമ്പുകയായിരുന്നു. ചൊക്ലിയിൽ നിന്നു വന്ന സുഹൃത്തുക്കളും സഹപ്രവർത്തകരും നിയന്ത്രിക്കാനാവാതെ വിങ്ങിപ്പൊട്ടി. പരസ്പരം ആശ്വസിപ്പിക്കാൻ വാക്കുകളില്ലാതെ നേതാക്കളും ഗുരുനാഥന്മാരും വാഹനങ്ങളിലിരുന്ന് കരയുന്നത് കാണാമായിരുന്നു. സ്നേഹം കൊണ്ട് സൗഹൃദസാഗരം തീർത്തൊരു യുവാവിന്റെ വേർപാട് ആരെയാണ് തളർത്താതിരിക്കുക. രാവിലെ 11 മണിയോടെ കൊയിലാണ്ടിയിൽ നിന്നെത്തിയ പോലീസ് നടപടി ക്രമങ്ങൾ പൂർത്തിയാക്കി 239 / 95 ആം നമ്പറായി കേസ് രജിസ്റ്റർ ചെയ്തു. 3743- നാം നമ്പർ മൃതശരീരം ഖാലിദിന്റേതാണെന്ന് സാക്ഷ്യപ്പെടുത്തി. മയ്യിത്ത് പോസ്റ്റ്മോർട്ടത്തിനെടുത്തു.

SYS ന്റെ ആംബുലൻസ് വാനിൽ ആശുപത്രി പരിസരത്തെ വിശ്രമ കേന്ദ്രത്തിൽ കൊണ്ടുപോയി കുളിപ്പിച്ചു. കഫൻ ചെയ്തു. പേരോടും ചിയ്യൂരും അതിനു നേതൃത്വം നൽകി. അവിടെ കൂടിയവരെല്ലാം മയ്യിത്ത് ഒരു നോക്ക് കണ്ടു. പി.കെ.എം. ഇരിങ്ങല്ലൂരിന്റെ നേതൃത്വത്തിൽ കുറച്ചു പേർ അവിടെവച്ചു നിസ്കാരം നിർവഹിച്ചു.

ഉച്ചയ്ക്ക് ഒന്നര മണി

ഖാലിദിന്റെ മയ്യിത്ത് കാരന്തൂരിലെ സുന്നി മർക്കസിലേക്ക്. മരുഭൂമിയിൽ തങ്ങൾക്കുവേണ്ടി വിയർപ്പൊഴുക്കിയ ആ മഹാത്മാവിനു വേണ്ടി അനാഥകളും അഗതികളുമടങ്ങുന്ന വിദ്യാർത്ഥികൾ ശൈഖുനായുടെ നേതൃത്വത്തിൽ നിസ്കരിച്ചു. പിന്നെ ഉള്ളുതുറന്ന് കണ്ഠമിടറി പ്രാർത്ഥിച്ചു. ഹൃദയവേദനയോടെ എല്ലാവരും ആമീൻ പറഞ്ഞു.

ഉച്ചയ്ക്ക് രണ്ടുമണിയോടെ മർക്കസിൽ നിന്ന് ചൊക്ലി യിലേക്ക് മയ്യിത്തു മായുള്ള പുറപ്പാട്. കാന്തപുരം ഉസ്താദ്, പേരോട്, എസ് എസ് എഫ് സംസ്ഥാന നേതാക്കൾ, പ്രവർത്തകർ തുടങ്ങി അനേകം പേർ വാഹനങ്ങളിൽ അനുഗമിച്ചു. അക്രമത്തിനും അനീതിക്കുമെതിരെ ധീരധീരം ശബ്ദിച്ച ഖാലിദിന്റെ പ്രസംഗങ്ങൾ കേട്ടു കോരിത്തരിച്ച കവലകളിലൂടെ ദീർഘനേരം നാഥനു മുന്നിൽ ഉള്ളുരുകി പ്രാർത്ഥിച്ച പള്ളികൾക്കു മുൻപിലൂടെ സുഹൃത്തുക്കളുടെ തോളിൽ കൈവെച്ച് സംസാരിച്ചു നീങ്ങിയ വഴിയോരങ്ങളിലൂടെ വിപ്ലവ മുദ്രാവാക്യങ്ങൾ ഉറക്കെ വിളിച്ച്, ക്രൂരമായൊരു തീരുമാനത്തിനെതിരെ ജനരോഷമിളക്കിവിട്ട യാത്രക്കു സാക്ഷി നിന്ന പെരിങ്ങത്തൂര്ലൂടെ ഇപ്പോൾ ഖാലിദിന്റെ മയ്യിത്ത് കടന്നുപോകുന്നു. സാബിറ മൻസിലിന്റെ മുറ്റത്തേക്ക് കവിയൂരിലെ റോഡുകളിലൂടെയെല്ലാം മനുഷ്യ നദി ഒഴുകുകയാണ് കേരളത്തിന്റെ ഒരറ്റം മുതൽ മറ്റേയറ്റം വരെയുള്ള ഖാലിദിനെ സ്നേഹിക്കുന്ന സഹസ്രങ്ങൾ അവിടെ ഒത്തുകൂടിയിരുന്നു. ഖാലിദിന്റെ സുഹൃത്തുക്കളും ശിഷ്യന്മാരും സഹപ്രവർത്തകരും ബന്ധുക്കളും കുടുംബാംഗങ്ങളു മെല്ലാമടങ്ങിയ വലിയൊരു ജനസഞ്ചയം. അക്കൂട്ടത്തിൽ പണ്ഡിതർ ഉണ്ട്, പ്രവർത്തകരുണ്ട്, ധനികർ ഉണ്ട്, ദരിദ്രരുണ്ട്, അഗതികളും അനാഥകളും മുണ്ട് അവസാനമായി ആ മുഖം ഒരു നോക്ക് കാണാൻ വീർപ്പടക്കി നിന്ന ആയിരങ്ങളുടെ കണ്ണുകൾ നനഞ്ഞു. വീടിനകത്ത് ആദ്യം മയ്യത്ത് വെച്ചു. ചെറുപ്പംമുതൽ കളിച്ചുവളർന്ന, തന്റെ ജീവിത വളർച്ചയ്ക്കു സാക്ഷി നിന്ന വീട്ടുമുറ്റത്ത് ഖാലിദിന്റെ മയ്യിത്ത് ദർശനത്തിന് വച്ചപ്പോൾ നിറകണ്ണുകളോടെ, ദുഃഖത്തിന് അലയടങ്ങാത്ത ഹൃദയത്തോടെ അനേകം പേർ! ഉറ്റ സുഹൃത്തുക്കളും സഹപ്രവർത്തകരും അവരെ നിയന്ത്രിക്കാൻ പാടുപെട്ടു.പലരും ഒന്നേ നോക്കിയുള്ളൂ. ആ ശാന്തമായ ഉറക്കം കാണാൻ അവസാനത്തെ അവസരം. പക്ഷേ ചേതനയറ്റ ആ ശരീരത്തിലേക്ക് അവർ എങ്ങനെ നോക്കും. മരണത്തിന്റെ ഭയാനകത യെ കുറിച്ച് അനിവാര്യതയെക്കുറിച്ച് പരലോകത്തെ കുറിച്ച് പറഞ്ഞു നടന്നയാൾ.

സമയം വൈകീട്ട് അഞ്ചുമണി

പ്രകൃതിയൊന്നടങ്കം മൂകതയുടെ ആവരണമണിഞ്ഞിരിക്കുന്നു. ചരിത്രത്തിന്റെ ഭാഗമായിത്തീർന്ന, ഇന്നലെയോടൊപ്പം ഓർമ്മകളായിത്തീർന്ന ഖാലിദിന്റെ മയ്യിത്തെടുത് പതിഞ്ഞസ്വരത്തിൽ തഹ്‌ലീൽ മുഴക്കി ആയിരങ്ങൾ കണ്ണോത് പള്ളിയിലേക്ക്. പല നാളുകളിൽ നാഥന് മുന്നിൽ നമിച്ച, വുളു ചെയ്ത, ദിക്റുകൾ ചൊല്ലി പ്രാർത്ഥിച്ച പള്ളിയിൽ ഖാലിദിന്റെ മയ്യത്ത് മുന്നിൽവെച്ച് ചിത്താരി ഹംസ മുസ്ലിയാർ, കൂത്തുപറമ്പ് ബാവ മഖ്ദൂമി തുടങ്ങി അനേകം പണ്ഡിതരുടെ നേതൃത്വത്തിൽ ആറ് തവണകളായി നിസ്കാരം നിർവഹിക്കപ്പെട്ടു. പള്ളിക്കാട്ടിൽ പുതുമണ്ണിളക്കിയിറക്കിയ ഇടുങ്ങിയ കുഴി - ഖബർ.

പുതിയൊരു ലോകത്തേക്കുള്ള പ്രാഥമിക കവാടം. നന്മ ചെയ്തവർക്ക് വേണ്ടി വിശാലമാക്കപ്പെടുന്ന പാർപ്പിടം. കർമ്മധന്യമായ ഒരു ജീവിതത്തിന്റെ ബാലപാഠങ്ങളെഴുതി പഠിച്ച മണ്ണിലേക്കൊരു മടക്കം.

പേരോട് അബ്ദുറഹ്മാൻ സഖാഫി പതറിയ സ്വരത്തിൽ ചൊല്ലിയ തസ്ബീത് കൂടിനിന്നവർ ഏറ്റുചൊല്ലി. വിതുമ്പലടക്കാൻ പാടുപെടുന്ന ആത്മമിത്രങ്ങൾ. കണ്ണുകൾക്ക് തളർച്ച. ഓരോരുത്തരും മൂന്നു പിടി മണ്ണുവാരി ഖബറിലേക്ക് അന്ത്യയാത്രാമൊഴി ചൊല്ലി.

"മണ്ണിൽനിന്നും നിങ്ങളെ നാം പടച്ചു,

മണ്ണിലേക്ക് തന്നെ നിങ്ങൾ മടക്കപ്പെടും.

മണ്ണിൽനിന്നു വീണ്ടും നിങ്ങൾ ഉയർത്തപ്പെടും"

നാഥാ, നന്മ ചെയ്തു വളർന്ന, നന്മ ഞങ്ങളോട് പറഞ്ഞു തന്ന, ഞങ്ങളുടെ ഖാലിദിന് ജന്നാത്തുൽ ഫിർദൗസിൽ കടത്തണെ. നന്മ ചെയ്തവർക്ക് അവിടെ സ്ഥാനമുണ്ടല്ലോ. പിന്നെ ഒരിക്കൽ കൂടി ആ മുഖം കാണാൻ കൊതിക്കുന്ന ഞങ്ങളെയും അവിടെ നീ ഒരുമിച്ച് കൂട്ടണേ നാഥാ. നിന്റെ പ്രവാചകനും മുത്തഖീങ്ങൾക്കുമൊത്ത്. ആമീൻ

+ History of SSF എസ്എസ്എഫിന്റെ ചരിത്രം

+ ആലി മുസ്ലിയാര്‍, നെല്ലിക്കുത്ത് - ജീവിതരേഖ

Education & Career

+ മദ്രാസ് യൂണിവേഴ്സിറ്റിയിൽ പിജി, ഡിപ്ലോമ കോഴ്സുകൾ പഠിക്കാം

+ ദേശീയ ന്യൂനപക്ഷ കമ്മീഷൻ വൈസ് ചെയർമാൻ ആതിഫ് റഷീദ് മർകസ് നോളജ് സിറ്റി സന്ദർശിച്ചു

+ അതിപ്പോ സുന്നത്തല്ലേയുള്ളൂ

+ കോവിഡ് രോഗിയുടെ മൃതദേഹം മതാചാരപ്രകാരം സംസ്കരിക്കാം

+ എസ് വൈ എസ് നേതൃത്വ പ്രയാണം

+ സാന്ത്വനം മെഡിക്കൽ ഉപകരണങ്ങൾ സമർപ്പിച്ചു

+ എസ് വൈ എസ് പ്രവർത്തകർ റിഫ്ലക്റ്റർ മിറർ സ്ഥാപിച്ചു

+ എസ് വൈ എസ് കീഴാറ്റൂർ സർക്ളിന് പുതിയ നേതൃത്വം

+ എസ്.എസ്.എഫ് പകലന്തി പ്രക്ഷോഭത്തിന് സമാപനം